|
In Egéa sezis naschidos
De Arabia grande zittade,
In cristiana caridade
Dae pizzinnos istruidos
Et dae tottus applaudidos
In su populu cristianu.
Sos nostros ... Già chi tenides tanta manu
supra d'ogni infirmidade
Rit. Sos nostros males sanade,
Santos Cosomo e Damianu.
Gosos de Sos Santos Cosomo e Damianu
Eccellentes in dottrina
Dottos in d'ogni scienzia,
Ma ue prus sa sapienzia
Mustrezis, sa meighina;
Cun arte tantu divina
Su malaidu restat sanu.
Sos nostros ...
Tottu cuddos chi trattades
Bos rispettant et bos amant
Sos Anargirios bos giamant,
Titulu chi meritades,
Pro chi de badas curades
Senz'interessu mundanu.
Sos nostros ...
Pro sa vera religione
Et odiu a sos cristianos
Ligados pedes e manos
Bos ponzesit in presone
Lisias senza rejone
Crudelissimu tiranu
Sos nostros ...
S'eccellente caridade
Ch'in pettus bostru ardiat
Prontamente bos moviat
A succurer cun piedade
In tanta nezessidade
A su corpus male sanu.
Sos nostros ...
Luciferu imbidiosu
Trattat de bos persighire
Pro chi non podet suffrire
Impleu tantu piedosu,
Ue salude e reposu
B'hat pro donzi cristianu.
Sos nostros ...
Si mustrat tot'impignadu
Cuddu inimigu infernale
Chi d'odiu fieru e mortale
Su tirannu hat ispiradu
Pro chi bos'eret ligadu
Cun modu meda inumanu
Sos nostros . .
Lisias plenu de furore,
Zegu in mesu de sa lughe,
Bos ponzesit in sa rughe
Pr'odiu de su Redentore
Et bois tantu disonore
Suffrezis cun coro uffanu.
Sos nostros ...
A sas falsas Deidades
Bos cumandat adorare,
Basciu pena de proare
Immensas barbaridades
Penosas crudelidades
Inventadas dai Paganu
Sos nostros ...
Su tirannu isperanzadu
De bos poder conquistare
Bos fattesit azzottare
Barbaru disapiadadu
Ma su disizu e coidadu
Li resessit totu invanu
Sos nostros ...
In s'incostante elementu
De sas abbas de su mare
Bos cherfesit annegare
Ma, cun insigne portentu
Bos ponet in salvamentu
Unu Anghelu soveranu
Sos nostros ...
Sas fiammas tant'ardentes
De unu furibundu fogu
Contra bois non hant isfogu
Et bos palpant reverentes
Ma brusiant a sos presentes
Ministros de su tiranu
Sos nostros....
Sende in sa rughe ligados
Pedras, frizzas bos pioiant,
Però a bois non lompiant
Proite fizis preservados
Dae su Chelu, et amparados
Dae s'Onnipotente manu.
Sos nostros ...
Finalmente degogliados
Cund'una crudele ispada Sa
corona suspirada Lucrezis
affortunados:
in su Chelu collocados
Favorid'a su cristianu.
Sos nostros . . .
A bois totu accudimus
Pro donzi nezessidade,
Santos mios remediade
Tantos males chi patimus,
E su prus chi nos timimus
Perder a Deus soveranu
Sos nostros ...
Bois tenides tanta manu
Supra d'ogni infirmidade,
Sos nostros males sanade,
Santos Cosomo e Damianu.
|
